بقلّب في المدونة، وقديمها.. بتكلم عن صحابي كتير جدا، وعنه، وعن الليل والنجوم، وأغاني منير فيه منها كتير جدا، وكوبايات الكاكاو السخنة، وبنات عمي وسفرياتي.. كل ده اختصرته لمافيش تقريبا.. أو أسباب الحزن زي مامسمياها.. كل ده راح فين؟

قرار جديد

اتخذت قرارا بنشر المدونة
ايه رأيكم؟
وايه التدوينات اللي تحبوا تشوفوها في الكتاب؟

وريش جناحاتنا لسّاته طالع

عزيزي كريم:

كنت اتحدث مع محمود عن قوايَ السحرية. في رسالة لي وعدته بأن أحاوطه بها فتطيب جراحه ويستكنّ، عله يبتسم. لكن ما حدث أني بعدها مباشرة استعجلتها فلما لم تجب فقدت الإيمان بها فتهاويت. انهرت يا كريم وكنت شاهدا على انهياري ودموعي، حاوطتني محاولاً منعي من التفتت حتت حتت حتت، “متخافيش” التي كررتها عليّ كثيرًا جدا، كانت تعويذتي التي تمسكت بها، عينيك نصف الدامعتين وأنت تخبرني أن ابحث عن الله بداخلي وأن أخاطبه، فهو قد نفخ من روحه فينا، فالروح تحمل دواءها وتعرف طريقها لكنها تستقوي بنا، وعلينا نحن أن ننتهج الطريق، ونعرف السبب والعلة، وطريق الحل.. يومها قلت لي يا كريم جزءًا من الحل، وعوّذتني، وهدهدتَ روحي، فاستكنت..

تحمل بداخلك قوى سحرية ولو لم تعترف بذلك يا كريم

بعدها قويت بعض الشيء، فبدلا من مشيتي المنحنية صرت امشي منتصبة القامة وإن في هدوء، لم أعرف بعد كيف ادب بقدميّ الأرض لأبعدها عني وابتعد عنها وأؤكد على وقفتي بدون دعامات، دون حاجة لسَنَد.. الحقيقة يا كريم أني ما زلت أحب السند، ولم أعرف بعد كيف ابتعد عن الأرض..

كنت أقول إني بدأت في استعادة قواي السحرية. الحقيقة أكثر أن إيماني بالماورائيات كان قد اهتز. تعرف أن الإيمان بالغيب وبقدرة الله اللانهائية يحتاج لقوة كبيرة، يعني لا يأتي بالساهل كده، وأنا كنت قد ابتعدت، بالفعل كنت قد ابتعدت.

القوى السحرية تأتي من الاستقواء بالله أولا، ثم نحاول الاستعانة بما سخره لنا على الأرض من مسببات القوة.. يعني مثلا الكاكاو يسند القلب، يتغلغل بداخله ويحاوطه فيسنده جيدًا، الحقيقة أكثر أن ما  كان لونه أسمر فهو أقرب للقلب، تماما مثل سمرة أهل النوبة الطيبين. صحيح أن التعميم خطأ، لكن صحيح أيضًا أن ماكان منه يجنح للطيبة فهو على صواب.. سمرتهم أقرب لطمي النيل حامل الخير، وللون التمر، وللقهوة زكية المذاق والرائحة..

عندك مثلا الفانيليا.. رائحة العيد والكحك والبسكويت والبيتي فور، رائحة الدقيق وريحة الكحك والزبدة والسكر المرشوش.. جربت الفانيليا على الكاكاو؟ حاول، ربما يعجبك طعمها :)

سورة يس وأوائل مريم وآل عمران، الفاتحة سبع مرات وآية الكرسي، المعوذتين، ارق نفسك بهما وامسح وجهك جيدا.. لا تنس البخور، الحقيقة أني لم أكن احبه مطلقا لكن مؤخرا بدأت أشعر بالطيبة في احتراقه لأجلنا، خاصة لو كانت رائحته خفيفة..

عزيزي كريم:

أنا لا أعرف أين الحقيقة، لكن كما ذكّرنا فضل، “لا يجرمنّكم شنآن قوم على ألا تعدلوا اعدلوا فهو أقرب للتقوى” و”لئن بسطت إليّ يدك لتقتلني ما أنا بباسط إليك يدي لأقتلك”، ونحن نحاول تلمس طريقنا في هذا الضباب يا كريم، ويسرني أنك تعرف طريقك بهذا الوضوح، فكأنك تعبر بين صفين من الأشجار وما حولهما غائم، لكن ما أمامك صافٍ. طالما أعجبتني قدرتك على رؤية الأشياء حتى وسط ضبابية الموجودات.

هدى الله قلبك لأجلي يا كريم، هدى الله قلبك

استباق الفرح

من قايمة عيد ميلادي اللي ح ييجي في شهر فبراير: عايزة ديوان حلو لمحمود درويش، وحد يطبع لي أشعار عمر مصطفى ويربطها لي بشريطة صفرا ويحط عليها ستيكرز، وكوفية مليانة خروم - نقعد نعدّها سوا- وكتاب مجّمع لكل ما كتب أحمد جمال سعد الدين بارك الله فيه، مربوط بشريطة زرقا منقطة أبيض
وكده يبقى إشطة جدا اقضي عيد ميلادي بدون اكتئاب إني كبرت سنة كمان :)

طب أنا حاسة دلوأتي بامتنان عظيم.. فيروز بتغني هيلا يا واسع وبعدين "دخيلك يا إمي" و"يا دارة دوري فينا"، وفتحت مدونة رحاب بسام لقيتها كاتبة تدوينتين جداد حلوين جدا زييها، وفتحت مدونة مع نفسي لقيت برضه تدوينة جديدة مع إنها محزنة شوية، وفتحت مدونة ريهام سعيد لقيت كلام حلو أوي زيها، وبسمع فانتزيا الشوكولاتة لآية.. ممتنة جدا للوضع الحالي ولنرمي بكل الأحزان والأوجاع في الزبالة.. الحمد لله على كل حال :)
بي إس: ح استلف من فودافون للمرة الرابعة واكلم اصحابي، محتاجاهم فعلا :)

عن السَنَد

من فترة كده، كان صديقي بيتكلم عن شغف جديد اقتحم حياته وملا قلبه بدون استئذان، وكان مبسوط.. حسيت بالامتنان أوي لمكالمته دي وإنه حكى لي على الجديد المبهج في حياته، انبسطت لانبساطه - رغم تحيّره في إنه يعمل ايه ولا ازاي - وقفلنا المكالمة بصمت كده، سكتنا إحنا الاتنين سكوت من ا للي مليان رغي وكلام ده، وحسيت بالامتنان أكتر، وقفلنا ونمت.. أول مرة من فترة أنام على انبساط كده ودعوات بالبهجة، دايما كنت بادعي إن ربنا يسندنا ما نقعش، أو يلحقنا لو وقعنا، إنما دعوة لانبساط وفرح كده، دي مدعيتهاش من زمااان.. وهي دعوة جميلة فعلا وتخلي الواحد حاسس بامتنان وأمان أكتر :)
أيوة، هي دي: الإحساس بالأمان.. من فترة وأنا الحمد لله حاسّاه، يمكن عشان فضلت قاعد ة في البيت فترة، وده في حد ذاته بالنسبة لي مش وحش، بالعكس، حاسّاه نعمة.. صحيح إني مبعملش حاجة لكني حاسة بالأمان وخلاص، بعد سحبة النِفس اللي كنت بحسها في قلبي وتدمرني، دلوأتي بقيت بتنفس بحرية :)
حاسة إني عايزة اعمل حاجة أكبر لصحابي، عايزة اطبطب عليهم واحضنهم واتمشى معاهم على شط النيل، وننبسط مع بعض سوا.. بغض النظر إن النيل بقى مكان للتحرش مش التمشية،، بس الأمنية نفسها مش عيب، وماله يا ستي مش عيب..
ليا كذا صاحب وصاحبة واقعين، يا إما متدمرين يا إما على وشك، قعدة لطيفة مع حد فيهم وللا مكالمة تليفونية مني ليهم، ح تبقى أحسن من الصمت المريب ده..
ايه كمان؟ آه، أول امبارح اتعرفت على ولد لطيف جدا، صغير جدا وناضج في تفكيره، روحه مرحة وحاساه طاير كده مش لامس الأرض، ما شاء الله عليه.. لولا ظروف تعارفنا الصعبة شوية كانت الصورة بقيت أحلى. أنا مبسوطة بيه فعليا وبادعي له ربنا يوفقه ويبقى حاجة كبيرة كده، بس هو يخلص مذاكرته بس :)
أنا مفتقدة الشغف على فكرة، بس حاسة إن الحياة ربما لطيفة معايا شوية دلوأتي، مش عارفة.. الحمد لله على كل حال، أنا أحسن :)

by El Nadeem

في مركز النديم نقوم حاليا بترصد وقائع الاعتقال والتعذيب والقتل خلال مائة يوم من حكم مرسي، بداية من يوم 30 يونيو حين أقسم اليمين. باقي من الزمن 18 يوما كاملة ومع ذلك وصل حجم التقرير حتى الآن 41 صفحة

متى تكتفي الداخلية؟ متي يأمرها مرسي بالتوقف؟

لينك

أفلام كارتون

سريعا كده وقبل ما اللينكات تتمسح من على شبكة الإنترنت، نلحق نفسنا وننزل الأفلام دي كووولها حتى لو مش حلوة، حتى لو ح نشوفها بعدين!

وول - إي
http://forums.fatakat.com/thread147860

أخويا الدب 1
http://forums.fatakat.com/thread142928

وجاري تحديث القائمة تباعا، بس أنا عايزة اقوم أنام، تصبحوا على خير!

هناك حكمة عليا أكيدة حول لماذا لا تتحقق أحلامنا بمجرد حلمنا بها..

لماذا أكره الإخوان؟ -1-

الجزء الأول من سلسلة مقالات تأتي تباعا تنويعا على نفس الفكرة:

* هذا ليس مجرد اختلاف في الرأي، فأنا لم اسألهم عن رأيهم في البيتزا بالصلصلة الحارة فصمتوا واعتبرت صمتهم هذا مجرد تجاهل منهم أو عدم معرفة أصلا بالصلصة الحارة، بل كان الأمر أشد وطأة وسوءًا، إذ من المفترض أنهم جماعة معارضة تعارض السياسات التي تراها خاطئة، والمفترض أيضًا أنهم "يعرفون ربنا" بالتعبير الدارج، أو أنه طالما اعتمد بناء جماعتهم على الدين الإسلامي فهم ملتزمون بتعاليمه، ومنها عدم السكوت على خطأ يرتكب أو حق يُنتهك أو عرض يستباح.

لكنهم في كل ما يلي، لم يفعلوا أيًا من هذا، والتزموا الصمت الذي يعد في هذه المواقف خطيئة وتواطؤًا مع مرتكب الجريمة، بل ويعتبر خيانة للمبادئ الثورية والإنسانية. ومن هذه المواقف:

1-    صمتهم عن فض اعتصام التحرير 25-26/2/2011، وعن جريمة كشف العذرية على الناشطات المقبوض عليهن من الاعتصام المفضوض، يوم 15/3/2011.

2-    ادّعاء أن من يقول "لا" في استفتاء التعديلات الدستورية 19/3/2011 مخالف لشرع الله، وأن الليبرالية كفر.

3-    رفضهم المشاركة في مظاهرات العباسية 23/7/2011 التي كانت ذاهبة للتظاهر أمام وزارة الدفاع باعتبارها معقل المجلس العسكري، وتخوين الثوار وتشويه صورتهم.

4-    تعهدهم بعدم الترشح في انتخابات مجلس الشعب إلا على 30% من المقاعد، ثم مخالفتهم لهذا الوعد –آية من آيات النفاق: إذا وعد أخلف- وترشحهم بأكثر من ذلك حتى أصبحوا أغلبية في المجلس.

5-    رفضهم مشاركة الشباب والقوى الثورية في جمعة تصحيح مسار الثورة يوم 9/9/2011، بادّعاء أن الثورة قد نجحت بالفعل، رغم تمسك المجلس العسكري الواضح بزمام الحكم.

6-    أنهم خالفوا وعدهم مع القوى السياسية بعدم رفع شعارات حزبية، ورفع شعار الجماعة فيما سمّي بجمعة قندهار (29-7-2011)، مما تسبب في انسحاب كل القوى السياسية من التظاهرات.

7-    سكوتهم على فض اعتصام أهالي المصابين في 18 نوفمبر 2011 وبداية أحداث محمد محمود الأولى، ورفضهم مناصرة المعتدى عليهم حتى يضمنوا الانتخابات، مما يعد خيانة عظمى.

8-    صنع كردون بشري من شباب الإخوان أمام مجلس الشعب في أولى جلساته، حيث كانت مسيرة متوجهة من شباب الثوار للمجلس للمطالبة بمحاسبة مرتكبي مجازر محمد محمود ومجلس الوزراء، وتعدي شباب الإخوان على الثوار –منهم فتيات- بالضرب بالعصيّ الكهربائية والأحزمة الجلدية.

9-    تمسكهم باختيار الجنزوري رئيسا للوزراء وقبولهم لأوامر العسكر، وتخوين المعترضين وتصويرهم على أنهم من الراغبين في ضياع مكاسب الإخوان البرلمانية.

10-                       موقفهم من فض اعتصام مجلس الوزراء وسحل البنات وضربهم، وعدم الدفاع عن الفتاة التي عرّاها الجيش من ثيابها، وسؤالهم الشهير: وهي ايه اللي وداها هناك؟

11-                       إصرارهم أن الأمن لم يعتدِ على المتظاهرين، ووصفهم بالبلطجية وشباب الترامادول، وذلك لتصديقهم كلام وزير الداخلية العيسوي في أحداث محمد محمود الثانية بعد موقعة بورسعيد.

12-                       نصرة نواب البرلمان الإخوان لمصطفى بكري بعدما اتهم البرادعي تحت قبة مجلس الشعب بأنه يدعم الخونة والعملاء، ورفضهم تحويله لمكتب رئيس المجلس للتحقيق معه، بل إنهم تمادوا وهنأوه وقبلوه بعد رفض تحويله للتحقيق والعكس: إصرارهم على تحويل زياد العليمي للتحقيق بعدما وصف – خارج المجلس- المشير بأنه "حمار".

13-                       إصرارهم على الاحتفال بالثورة في 25/1/2012 وعدم مطالبة المجلس العسكري بتصحيح الأوضاع أو مساءلته عن الدماء التي سالت، مما يندرج تحت بند خيانة الثورة.

14-                       مطالبتهم بمعاقبة النائب البرلماني محمد أبو حامد حينما قال –خارج المجلس- إن الشرعية للميدان، وعندما احتاجوه قبل انتخابات الرئاسة رددوا نفس كلامه: الشرعية للميدان.

15-                       رفضهم التعليق على المادة 28 من الإعلان الدستوري في مجلس الشعب، ورفضهم إصدار مطالبة للمجلس العسكري بتعديلها، وعلى العكس، حينما تم عزل خيرت الشاطر ومنعه من المشاركة في انتخابات الرئاسة دعوا إلى مليونية.

16-                       وعدهم بعدم المشاركة في انتخابات الرئاسة، ثم ترشيح اثنين، تأكيدًا لمبدأ "إذا وعد أخلف" الذي يمشون عليه بدأب منقطع النظير.

*********
فكرة وتجميع مصادر: أحمد أسعد
تحرير: أنا

ردا على مقال د. علاء الأسوانى "هل يكره المصريون النجاح"

عزيزى د. علاء الأسوانى،

قرأت مقالكم بعنوان "هل يكره المصريون النجاح؟" وأصابنى المقال بالمرارة والأسى لكونه متحاملا بقسوة على جامعة النيل التى أعتز بكونى أحد أبنائها وافتخر بقضائى أكثر من 8 سنوات ضمن فريق بنائها .

وكم كنت أتمنى أن تدرس موضوع جامعة النيل بدقة وعناية وأن تستمع إلى الطرف الآخر قبل أن تتبنى رأى و وجهة نظر أحد الأطراف.

فمن الواضح أن ما تعرفه عن جامعة النيل صورة مشوهة للواقع ، ويغيب عنها الكثير من الحقائق والتفاصيل المهمة فعلى سبيل المثال وليس الحصر:

·         هل تعلم يا سيدى أن أرض جامعة النيل كانت دوما ملكا للدولة وتحديدا لوزارة الاتصالات؟ و أن جامعة النيل مشروع قومى كان ضمن الخطة القومية لوزارة الاتصالات وتكنولوجيا المعلومات منذ إنشائها؟ وأن عقد بيع الأرض لوزارة الاتصالات وتكنولوجيا المعلومات مشروط بإقامة جامعة تكنولوجية بحثية عليها؟

·         هل تعلم أن الأرض التى وضع عليها د. زويل حجر أساس "جامعة العلوم والتكنولوجيا " عام 2000 كانت الأرض المجاورة لأرض جامعة النيل؟ وأن موضع حجر الأساس كان دوما ومازال أرضا فضاء غير مخصصة أو مباعة لأى جهة ؟

·         هل سألت د. زويل إذا كان لديه أى مستند يثبت أن هذه الأرض (أو غيرها) تم تخصيصها أو بيعها له عام 2000 كما يدعى؟

·         هل تعرف أن جامعة النيل أنشأت كجامعة أهلية بكل مقومات الجامعة الأهلية (غير هادفة بتاتا للربح وغير مملوكة لأفراد وأى فصيل آخر) ونظرا لعدم وجود قانون للجامعات الأهلية فى 2006 ، فتم إنشاؤها كجامعة خاصة لا تهدف للربح ومن خلال مؤسسة أهلية لها صفة النفع العام  حتى تكون مطابقة لتوصيف الجامعة الأهلية؟ كما أن الرئيس المؤسس لهذه المؤسسة هو الدكتور إبراهيم بدران؟ أى أن الذى بنى الجامعة ليس أحمد نظيف كما تدعى...

·         هل تعلم أن نموذج الجامعة الأهلية شائع فى العديد من الدول وهو يقوم على شراكة بين الحكومة والمجتمع المدنى حيث تشارك فيه الحكومة بتوفير المقر (الأرض و المبانى)؟ وهو تماما ما يحاول د. زويل أن يبنيه . لكنه حلال على د. زويل وحرام على غيره.

·         هل تعلم أن جامعة النيل قامت بالإنفاق على تجهيزات المبانى والبنية التحتية وشبكات المعلومات لمبانيها بمبلغ يصل إلى 50 مليون جنيه من أموالها ومن تبرعات الشركات لها ؟ وقضى الأساتذة والعاملين بالجامعة سنوات فى تصميمها وكتابة مواصفاتها والإشراف على تنفيذها؟

·         هل تساءلت لماذا وكيف تنازل مجلس أمناء المؤسسة الأهلية التى أنشأت الجامعة (وليس الجامعة والقائمين عليها) عن حق الانتفاع وعن كل أصول الجامعة وكل التبرعات التى حصلت عليها؟

·         تتساءل عن السبب فى عدم إعلان الحكومة عن التنازل. الأسباب يا سيدى هى:

o        أنه تنازل غير قانونى لأنه ليس من سلطة مجلس الأمناء التنازل.

o        أنه لم يتم بمحض إرادة مجلس الأمناء ولكن تحت ضغط وتهديد من أحمد شفيق (رئيس الوزراء حين ذاك) وفايزة أبو النجا .

o        أنه قرار منفرد من رئيس مجلس الأمناء .

وعموما فالأمر منظور فى القضاء منذ أكثر من عام وليت القضاء يسرع بالبت فيه لأهميته.

·         هل تعلم أن جميع الأجهزة الرقابية من جهاز مركزى للمحاسبات ونيابة إدارية وغيرها قاموا بالتحقيق و بالمراجعة لموقف جامعة النيل ولم يجدوا أية مخالفات؟

·         هل تساءلت عن الأسباب التى دفعت أحمد شفيق إلى اتخاذ قرارات سحب الأرض والمبانى من الجامعة فى خضم الثورة ؟ وأن إجراءات النقل تم تنفيذها فى ساعات قليلة ؟ و لو كان الأمر بهذه السهولة فلماذا لم تسترجع المليارات المنهوبة والأراضى المسلوبة من أنحاء المحروسة خلال النظام السابق؟

·         هل تعرف ما أنجزته جامعة النيل على مدار 5 سنوات؟ وبميزانية لا تتعدى كسور ما جمعه د. زويل لمشروعه قبل أن يبدأ؟

·         هل تعلم أن الجامعة تقدمت بطلب تحويلها لجامعة أهلية فور صدور قانون الجامعات الأهلية وتمت الموافقة على هذا الطلب من المجلس الأعلى للجامعات ووزير التعليم العالى لانطباق كل الشروط على الجامعة؟ وأن حكومات ما بعد الثورة المتعاقبة أوقفت إجراءات هذا التحول ؟

·         هل تعلم أن عشرات الأساتذة والباحثين المصريين عادوا ليعملوا بجامعة النيل تاركين مناصبهم وجامعاتهم فى أمريكا وكندا و أوروبا ؟

·         هل تعلم أن أوائل خريجى الجامعات المصرية الحكومية تعطيهم الجامعة منحا كاملة ومرتبات شهرية للتفرغ للأبحاث خلال دراستهم للماجستير؟ وأن الكثير من هؤلاء فازوا بجوائز دولية مثل هيثم دسوقى الفائز بمسابقة نجوم العلوم العرب.

·         هل تعلم أن خريجى الجامعة من الحاصلين على الماجستير يحصلون على منح دراسية كاملة من أكبر جامعات العالم لدراسة الدكتوراه؟

·         هل تعلم أن جامعة النيل تجرى أبحاثا بالتعاون مع شركات عالمية مثل ميكروسوفت وإنتل وجنرال موتورز وغيرها ومحليا مع معهد السرطان ومؤسسة مجدى يعقوب و غيرها؟

·         هل تعلم أن الكثير من القائمين على الجامعة والاساتذة يعملون بدون مقابل أو تنازلوا عن مرتباتهم أو جزء منها منذ أكثر من عام لكى يحافظوا على هذا الكيان الذى بذلوا فيه الجهد والعرق؟

·         وإذا كان النظام السابق الذى حارب د. زويل لم يسقط كما ذكرت فى مقالك ، وأنا اتفق معك فى ذلك ، فكيف تفسر التحامل على جامعة النيل ومحاولة هدمها مع إعطاء د. زويل كل الصلاحيات والتسهيلات؟

هذه عينة من الأسئلة التى كنت أتمنى أن تعرف إجاباتها قبل كتابة هذا المقال.  وأتعجب من كيفية محاولة البعض إيجاد مبررات لطرد طلاب وباحثين وأساتذة من مقر جامعتهم الذى بذلوا الجهد والعرق والأموال لتجهيزه على مدار سنوات.

وهنا أتذكر مقولة د. زويل: "الغرب ليسوا عباقرة ونحن أغبياء .. هم فقط يدعمون الفاشل حتى ينجح ، ونحن نحارب الناجح حتى يفشل !!!"

وليت د. زويل يبدأ بنفسه... فإذا كانت جامعة النيل فاشلة فليساعدها حتى تنجح ... وإذا كانت ناجحة فليتركها ولا يحاربها.

يا سيدى من يكره النجاح هو من يحارب كيان قائم ومنتج وناجح و يصر على تدميره...

نحن لسنا ضد د. زويل شخصيا أو ضد النجاح كما تحاول تصويرنا... ولكننا ضد من يحاول تدمير كيان قضينا 9 سنوات فى بنائه وضد من يحاول الاستيلاء على مجهوداتنا وعرقنا وينسبه لنفسه . هل أصبح من يدافع عن حقه وعن مجهوده كارها للنجاح؟

يا سيدى أرض الله واسعة وما أكثرها فى مصر ، و يمكن للدكتور زويل أن يقيم مشروعه العظيم فى أى مكان آخر فعلى سبيل المثال يمكن إعطاء مشروع د. زويل أضعاف مساحة أرض جامعة النيل فى سيناء أو فى الصعيد ويكون بذلك نواة للنهوض بهذه المناطق التى طالما عانت من عدم الاهتمام والتهميش. ولإثبات حسن نيتها فنحن على استعداد لاستضافة مشروع د. زويل حتى ينتهى من بناء مقره فى أى مكان آخر.

وإذا كانت لديكم الرغبة فى سماع الرأى الآخر فنحن على أتم الاستعداد لذلك وسنقوم بتوفير كافة المستندات والتسجيلات التى تثبت موقفنا . وسنكون شاكرين فى حالة تلبيتكم لهذه الدعوة. 

وشكرا.

د. محمود علام

أستاذ بجامعة النيل

زويل.. اديسون مصر.. امام ابناء تسلا

أعيد هنا نشر هذه المقالة، وبعد إذن كاتبتها طبعًا:

زويل.. أديسون مصر.. أمام أبناء تسلا

 بقلم: نور حمدي

لطالما كان اسم أديسون ملتحق بالكهرباء كالتحاق اسم الأب بابنه، حتى إن اسم أديسون قد دوّن في جميع كتب أعظم 100 رجل في العالم. 

توماس أديسون ذلك المخترع العبقري العظيم واسع الشهرة الذي اخترع المصباح والكهرباء بل وأيضا العداد الكهربائي المستخدم في حساب تكلفة الاستهلاك في المنازل. اعتبر تياره الكهربائي المعيار الاساسي في الولايات والمتحده الامريكيه وفي لندن ايضا مما وفر له ثروة ضخمه من عائدات براءة الاختراع. 

 

توماس أديسون

بس اللي ناس كتير ما تعرفوش إن العظيم أديسون الذي أهدى للعالم النور في صورة مصباح كهربائي، قرر في وقت من الأوقات إطفائه مره أخرى إن لم يُضأ على طريقته ! 

لأن في الحقيقه الكهرباء اللي بنستخدمها دلوقتي مش كهرباء أديسون، لأن ببساطة لو كنا مشينا ورا أديسون كان زمان معظم الكوكب عايش بالفوانيس والمشاعل .. والناس اللي واصلها كهربا كان زمانها بتدفع فواتير تتراوح من 1000 إلى 3000 جنيه مصري شهريا.

وده لأنه ببساطه تيار اديسون المستمر (اشبه بكهرباء البطاريات) مكنش ينفع معاه محولات وكنت بتحتاج انشاء محطة توليد كامله كل 1 كيلو متر او 2 كيلو متر بالكتير ..تخيلو لو ان العالم كله كان شغال بالحجاره كان حيبقى عالم ازاي؟

طب أومال العالم كله دلوقتي عايش بالكهربا ازاي؟

الاجابه ان العالم كلو دلوقتي عايش على الكهربا الي اخترعها تسلا (التيار المتردد)ء

ودي اسهل كتير في نقلها لمئات والاف الكيلو مترات وارخص كتير لاننا ممكن نستغل اي مصدر طبيعي لانتاجه وقود،رياح، شلالات ، السد العالي الخ.. وللاسف مولدات اديسون مكنتش تقدر تشتغل غير بالوقود فقط ومكنتش تقدر تغطي اكتر من منطقه في محيط 1 ميل (1-2 كيلو متر)ء

ولكن المدهش في الموضوع ان العالم فضل فتره مش قليله بيستخدم كهرباء اديسون ويسخر من اختراع تسلا

وده لان وقتها - ولغاية دلوقتي كمان- اديسون كان اشهر مخترع على ضهر الكوكب ، 

اديسون استغل كل شهرته واتصالاته السياسيه في تشويه تسلا واعماله ، اتهمه بالجنون والنصب والشعوذه على صفحات الجرائد .. اشترى كل ديونه من البنوك واعلن افلاسه.. واجر بلطجيه تحرق معامله وابحاثه.. واحتكر عقود شركات الكهرباء.

المصيبه ان اكتر شخص كان عارف قيمة عمل تسلا هو اديسون نفسه ، مش الصحفيين ولا السياسيين

المصيبه الاكبر ان معظم العلماء وقتها انحازوا لاديسون اما مجاملة واما خوف

تسلا الي كان بيحلم بطاقه مجانيه للجميع.. لقى نفسه محاصر ومفلس ومهان..

الفكره الي قعدت تشغلني فتره طويله.. هل ممكن شخص في عبقرية وعظمة اديسون.. في الاخر يخون العلم ويخون البشريه الي بيخدمها؟

هل ممكن  غرور العظمه يخليه يقف قدام علمه ورسالته؟ء

هل مكانتك العلميه والاعلاميه حتخليك محصن اخلاقيا امام العالم وبره مجال المسائله ؟

هل ممكن ان المجتمع العلمي يوصل لهذه المرحله من الضعف والصمت امام سلطة السياسه والمال والاعلام؟

في النزاع القائم بين زويل وجامعة النيل من اكتر من 18 شهر كل الي كان شاغلني موقف زويل نفسه.

كلا المنظرين لكلا طرفين النزاع بيستخدم من الادله والحجج الي يدعم بيها حق فريقه امام الرأي العام.

في الحقيقه معظم الرأي العام منحاز لسمعة وصيت احمد زويل صاحب نوبل والي حينقل مصر لعصر الفيمتو ثانيه.

اكتر منه منحاز لقضيه او موقف او ادله

في الحقيقه زويل داخل المعركه دي بنوبل ونقطه

ولكن المرعب في الموضوع ان زويل نفسه اكتر شخص عارف ان المباني دي مش بتاعته ولا من حقه

زويل هو الشخص الي عارف انه ما بناش طوبه في المكان ده وما شاركش لا من قريب ولا من بعيد في اي من تصميماته

صورة للقائمين على جامعة النيل مع بعض الأساتذة والاستشاريين أثناء مراحل البناء 2008

صوره من حفل تخرج 120 طالب ماجستير دفعة 2010 من مقر الجامعه الي دلوقتي زويل بيقول انه بتاعه

كان مشهد سخيف جدا بالنسبالي وهو بيفتتح جامعة زويل وهو بيشرح للكاميرات والحشود الموجوده تصميم الجامعه على الماكيت الموجود قدامه.. ويقول المكان ده مخصص لكذا.. والمكان الفلاني اتعمل بالطريقه الفلانيه عشان استيعاب كذا وكذا.. ولف بيهم في المعامل بيشرحلهم التكنولوجيا الي مصممه بيها القاعات والهدف منها 

بالظبط كانه بيفرج الضيوف على بيته او فيلته والانتريه والجنينه وشجر المانجه .

ومكنش حيبقى عندي اي مانع لو فعلا المكان بيته او شارك في تصميمه او اختيار اي من التكنلوجيات او التصميمات الي كان بيستعرضها.

المساله عندي اخلاقيه بحته.. المكان ده حصيلة مجهود 8 سنوات من التخطيط والتصميم والبناء لم يشارك زويل في اي من مراحلها ... وجه على الجاهز حط اليافطه بتاعته وتعامل وكانها باكورة اعماله وانجازاته.

في الافتتاح مكنش موجود اي شخص من الي بنوا المكان فعلا او وضعو تصميماته.

كانوا في البيت قدام التلفزيون بيتفرجو على احمد زويل بيتمشى في المكان و بيشرح افكارهم وتصميماتهم للناس بدون ما يذكر اي من اسمائهم.. والناس كلها بتسقفله.

  الماكيت نفسه  الي  واقف بيشرح عليه زويل تفاصيل المدينه الي عمله باحثين جامعة النيل قبل الثوره باكتر من شهر وتم سرقته من مبناهم المؤقت في القريه الذكيه ليستخدمه زويل في افتتاح المباني

زويل ارتضى رشوه سياسيه من احمد شفيق والمجلس العسكري.. في مقابل تحييده عن المعركه السياسيه القادمه ، عشان كده  ما سمعناش حسه تاني من بعد الثوره في كل المجازر الي ارتكبها المجلس العسكري في البلد وفي الثوار. 

زويل اكتر شخص عارف ان كل الحلول الي بيعرضها على طلبة جامعة النيل هي بمثابة الموت الرحيم لمشروع جامعة النيل.. وهي في الحقيقه حلول انتهازيه.. يغري فيها زويل طلبة جامعة النيل انهم يبقو جزء من مشروعه في مقابل انهم يتخلة عن اسم جامعتهم... ويدهشني طلبة الجامعه في ثباتهم على موقفهم ومبدئهم في حين ان بعض من أساتذتهم لم يقاوموا بنفس هذه الضراوه.

ممكن يكون زويل عبقريه عالميه.. زي اديسون تمام بس يفضل انه في الموقف ده بالذات خان نفسه وخان الامانه العلميه وتصرفه مع طلبة جامعة النيل تصرف لصوصي بحت ..زي مارك جوكربيرج عبقري البرمجايت الي تعاقد معاه اتنين من زمايله في الجامعه بهدف تصميم موقع للتواصل الاجتماعي اسمه "الفيس بوك" فسرق فكرتهم وسرق فلوسهم وبقى اشهر شاب على الارض

 عبقريه غير امينه وغير مبدأيه وبهذا القدر من الانتهازيه.. ازاي نأتمنها على المستقبل العلمي لبلد بالكامل ولاجيال قادمه

 دخول المعركه بجملة "ده صاحب نوبل" بتفكرني بدعاية "صاحب الضربه الجويه" الي طلع عينا بيها 30 سنه 

في رأيي المفروض المجتمع البحثي والعلمي في مصر ياخد خطوه جريئه لانها معركته بالاساس ولانهم الاكثر درايه  وباهمية مشروع جامعة النيل ككيان بحثي مستقل وبحقهم الشرعي في مبانيهم ومعاملهم البحثيه

اعتصام طلبه جامعة النيل هو حق شرعي في نضالهم من اجل حقهم المبدئي

وخطوة شجاعه وجريئه اخدوها قدام المارد "زويل" رغم ضعفهم وقلة عددهم امام طوفان زويل الاعلامي

 زي ما وقف زمان تسلا قدام طوفان اديسون 

بيفكرني بيه دلوقتي كفاح باحثين جامعة النيل .. ابناء تسلا

نيكولاي تسلا سيأتي يوم تكون فيه الطاقه مجانيه من اجل الجميع

انا هنا بتعرض فقط للموقف المبدئي الي بين زويل وطلبة جامعة النيل .. وبالنسبه للادله الي بتساند حق طلبة الجامعه في مبانيهم ..فهم يقدرو يعبروا عن ده اكتر مني

هنا لينك لمدونة الجامعه وعليها بعض مقالات كتبها اعضاء هيئه التدريس او طلبه في الجامعه

http://nileu.blogspot.com/

*********************************************************************************************
لينك المقال الأصلي:

https://www.facebook.com/notes/nor-hamdy/%D8%B2%D9%88%D9%8A%D9%84-%D8%A7%D8%AF%D9%8A%D8%B3%D9%88%D9%86-%D9%85%D8%B5%D8%B1-%D8%A7%D9%85%D8%A7%D9%85-%D8%A7%D8%A8%D9%86%D8%A7%D8%A1-%D8%AA%D8%B3%D9%84%D8%A7/10151140692079059

  

نقول من الأول: قرض البنك الدولي سيء جدا وشيء مش كويس ومش في صالحنا للتالي:
1- سياسات صندوق النقد الدولي اللي هي رأسمالية بالأساس وتشجع السلوك الرأسمالي للدول، واللي هو مش في مصلحة الشعوب بالضرورة.
2- لسه معرفناش ايه هي شروط القرض بس كقاعدة عامة: الحداية مبتحدفش كتاكيت
3-المبلغ وفوايده ح تضاف على القروض اللي بالفعل بندفعها ونحاول نسددها منذ عشرات السنين لحد دلوأتي، وده بيحدّ من إمكانية الإنفاق على البنود الأساسية زي التعليم والصحة وخلافه

والأكيد إن ربنا بيحبنا حتى لو ما اقتنعناش بده

رمضان كان حلو السنة دي، يعني على مستوى الإيمانيات والروحانيات وكده، كان لطيف. روتينية المرواح للشغل - افتقدها دلوأتي- والرجوع منه وتحضير الفطار والغيبوبة بعديه، ومحاولة الحفاظ على الصلاة، وحاجات تانية، من ألطف الحاجات اللي وقعت من فترة يعني، والحمد لله على كل حال :)

يعني، مش بحب اتكلم أوي على علاقتي بربنا بس حبيت افضفض لنفسي شوية.. بقول إن رمضان كان حلو، مكنتش بنزل اصلّي في الجامع عشان الرقابة: إنتي مبتنزليش ليه، إنتي نزلتي، بتنامي ليه، بتصحي ليه، بتعملي ايه، اقفي جنبي، اقفي عدل، اقعدي/اقفي والإمام بيقرا.. إلخ.. حاجة آخر قرف يعني.. بس حسيت براحة نفسية وأنا بصلي لوحدي، كمان الإمام صوته بينرفزني، بقاله شوف ييجي عشرميت سنة بيصلي تحت وبرضه لسه بينرفزني، حاجة كده زي صوت عمرو خالد، وهما الاتنين عمرهم ما ح ينعدلوا في أصواتهم دي أبدًا!

المهم، علاقتي بربنا اتحسنت رغم إن أغلب السؤالات ما لقيت لهاش اجابة، يمكن عشان مدورتش كويس: يعني مثلا ليه الألم موجود في الدنيا؟ وليه لازم كل الأسى والأسية دي في العالم؟ وليه ربنا منصرش سوريا لحد دلوأتي؟

حاسة إني مدورتش كويس، يعني مقريتش أكتر عن ربنا وعلاقته بينا وعلاقتنا بيه، ولا قريت حتى تفسير القرآن.. المفروض إن اللي يحب حد يحاول يعرفه أكتر وعن قرب، ولله المثل الأعلى، لو قلت إني بحب ربنا فلازم اثبت ده بالدليل العملي، إني أحاول افهم ربنا وأفهم علاقتي بيه المفروض تبقى عاملة ازاي.. وأنا كسولة شوية في النقطة دي، أو انشغالي كان له عظيم الأثر في ضيق وقتي المخصص للقراية والبحث.. دلوأتي المفروض مبقيتش مشغولة المفروض بقى اتجه لمعرفة الإجابة عن تساؤلاتي الكتيرة..

بس كده ده اللي حبيت أقوله

كرهت نفسي لما شخطت في اخويا الصغير وقلت له اتفلق واخبط دماغك في الحيط، تقريبا فيه حاجة انكسرت ما بينّا..

أغنية معلقة في دماغي

واحد مفيش غيره
ملا الوجود نوره
دعاني لبيّته
لحد باب بيته
ولما تجلّى لي
بالدمع ناجيته
بالدمع ناجيته
****

"سافري بقى إنتي ح تقرفينا؟"
- فيلم أحلى الأوقات-

هري لا يعني أحدا

عندي مشكلة مع القراءة، يعني الحاجات الطويلة عيني بتنط من عليها بسرعة وبزهق، صاحبتي بتقول لي إن ده سببه التعود على بوستات الفيس بوك القصيرة بطبعها، وإنها قريت الكلام ده في مقالة علمية*

بحب صاحبتي دي، والنهاردة ارتكبت غلطة فادحة عملتها قبل كده، اتصلت بيا وهزأتني، خفت لتقطع علاقتها بيا بسبب الحوار ده بس الحمد لله طلعت أكبر واعقل من كده، دلوأتي خايفة اتصل بيها لاتهزأ تاني..*

الشغل سابني، يعني استغنوا عن خدماتي خلاص، عشان بطيئة، قالوا لي اصحابي إن طريقتهم في الشغل في إبلاغي بالموضوع كانت غبية جدا، وأنا صدقتهم الصراحة، كانوا أغبياء فعلا*

وحشني هاري بوتر ونفسي اشوفه تاني، خصوصا الجزء الأخير*

أسافر؟ مسافرش؟ أعمل ايه؟*

بقالي كتير جدا مسمعتش أغانيا اللي بحبها*

لازم اقرا للمسيري*

نفسي انزل بكرة أروح شارع المعز اتمشى فيه شوية، بس روحي تقيلة، وده العادي بتاعها جبت ايه جديد؟*

نفسي أقرا لبلال علاء بس مش بعرف اركز في القراءات الطويلة كما اتفقنا، رغم إنه برنس يعني*

أصحابي وحشوني*

المدونة هنا موحشتنيش*

عن الإحباط العام والانتصارات الصغيرة

أنا مش فقيهة سياسية، معرفش طول الوقت إحنا رايحين فين ولا بنعمل ايه، ولا اللي بنعمله ده صح وللا غلط، بس عارفة إن التظاهر في أغلب الأوقات صح، طالما بنقول للعسكر لأ.. معرفش ح نخرج من الورطة اللي إحنا فيها ازاي ولا ايه خريطة الطريق. ولا بعرف اركز في القراية عشان اطلع بالإجابة .. بس أنا عندي همومي الشخصية اللي بركز فيها، الولد الحلو اللي نفسي إنه ياخد باله مني، ويبادلني مشاعري دي.. التركيز في الهموم الشخصية دلوأتي بيمنعني إني انهار في ظل الإحباط العام اللي إحنا عايشين فيه، يعني لو حصلت "انتصارات صغيرة" بتغير من المود جدا وبتخلي للسعي معناه بدل الهم اللي إحنا فيه
أنا نفسي اقول له الكلمتين دولت لحسن يكون مفكرني بفهم سياسة وللا حاجة..

تحت الغطاء

استيقظ مبكرة كما  اعتدت بقية أيام الأسبوع، رغم أني أكرر لنفسي أن اليوم جمعة واستحق النوم لأطول وقت ممكن، تعويضًا عن الاستيقاظ كل يوم في السادسة والنصف قرفانة.. أضع رأسي تحت الغطاء ثانية، واحضن عروستي العصفور بشدة، كأنما أحاول إدخالها لصدري لتملأ الفجوة التي أحسست بها ما إن استيقظت. قلت ذات يوم لأحد أصدقائي إني أشعر كأنما ألفظ روحي عندما أصحو، لكن الشعور الأدق على ما اعتقد هو الفجوة، خرم عميق يفتح بحدة كأنما بسكين ويخترق روحي ويجعلني أفزع.. 

أقول لأتغلب على إحساسي بالفزع أفكر بكَ، نعم أفعل.. اتخيل أنك هنا بجانبي تحضنني وتقول لي لا تقلقي، نفس العبارة التي رددتها "رحاب بسام" في حلمها، في كتاب "أرز باللبن لشخصين" الذي أقرؤه حاليًا، للمرة المليون تقريبًا. تردد لا تقلقي ولا تخافي فأنا هنا، وأبدأ في تخيل حكاية تحكيها لي لتذهب عني الخوف. في تسع من عشرة حالات لا أنجح إلا في وصف مطاردات ودماء تسيل وميادين مظلمة، إلى الآن لم اتصالح مع الظلمة، واتخيل أن الليل يحل فقط لنكنّ في بيوتنا ولا نخرج منها.. 

اتقلب على سريري وأنا مازلت تحت الغطاء، كلّي كده. أمد يدي من تحت الغطاء لأسحب الكتاب واقرأ فيه صفحتين، اتعجب من قدرتها على الحكي وابتسم وامتن لها، أغلقه وكلّي خفو من أن ينتهي سريعًا فلا أجد شيئًا أشعر معه بالوَنَس والألفة والأمان اقرؤه.. صحيح أن "خارطة الحب" معي الآن بعد أن استلفتها من نيفين، لكني لم استطع بعد تجاوز بدايتها الحزينة، عندما كانت آنا تحكي عن إدوارد وتبدّله منذ عاد من السودان، والفظائع التي ارتكبها الجيش الانجليزي هناك وشهدها إدوارد.. أترك الكتاب وأعود لتخيلك، أنام مطمئنة فأحلم..

حلمت بأني كنت و"ر" نتمشى في مكان يشبه الميناء، والبحر على يميننا، والدنيا ظلام . فجأة طلع لنا حسام وحاول التعدي عليها، فجئت بها خلفي ووقفت أدافع عنها وأضربه، ضربته بشدة وضربني حتى جاء سمير وضربه معي، ثم تجمع الناس حولنا وفضوا العركة، وذهبت أنا للمستشفى. طول الوقت كان سمير صامتًا، كعادته، وكانت "ر" تبكي لأنها لم ترد لي أن اتأذى، أو ادخل في هذه المشاجرة من أصله. ابتسمت لها وقلت إني بخير. كنت اتمنى أن أراك أنتَ أيضًا، تدافع عنّا وتثني على شجاعتي، وتبتسم لي..

استيقظ تمامًا، اتخذ قرارًا بألا أشارك في مظاهرات اليوم، لا استطيع تحمل أن أومن بشيء بشدة، ولا يتحقق، أو انزل للميدان ثم يهجموا علينا. قررت أن احترم إحساسي الداخلي. أتذكر يوم 4 مايو؟ قلت لك إني خائفة جدا فقلت ألا أخاف، قلت لن أشارك فلم تردّ عليّ. تذكر يومها؟ انخلع قلبي عليك لكني كابرت ولم اتصل بك، عرفت بعدها ببطولتك في هذا اليوم، وزاد احترامي لك..

أقرر قضاء اليوم مع أمي، نتكلم فتأتي على سيرتك. تسألني: هاه فيه حد؟ اتهرب جدًا من الإجابة ويحمر وجهي ويبان عليّا، تقرر أمي ألا تضيق علي الخناق أكثر - منذ متى وهي عذبة هكذا؟ :) - فنتكلم في موضوع آخر.. تأتي على سيرة السفر فتدمع عيناي، لست مستعدة له أبدًا الآن..

أعود لقراءة رحاب بسام إلى أن تستيقظ أختي، امتنّ جدًا لوجودها في حياتي في الفترة الأخيرة، محبة وطيبة وتسندني كثيرًا، اتعكز عليها جدًا فلا تشتكي ، بل تبتسم وتمنح أكثر. اتغطى جدًا فتجلس جواري تحضنني وتغني لي، أنام بجوارها فتفسح لي مكانًا وتكمل نومها.. تصنع لي طعامًا طيبًا وتشتري نوع شوكولاتة جديد لنحتسيه سويًا، كأنه سرّنا الصغير. تشجعني على السفر والبحث عن فرص أكثر وأكبر، تشجعني دائمًا كروح طيبة ولا تملّ مني أبدًا.. ربنا يخليها لي :)

عامة، أنا مش مهيأة للسفر حاليًا، وأفضّل البقاء في السرير أطول وقت ممكن، وممتنة جدا للمنوم اللي باخده، وبحب اكلمك حتى لو إنت مش واخد بالك زي دلوأتي حالا مثلاً، وح ادي التدريب فرصة، ولازم اشوف أصحابي قريب، وأحيانًا بيكون عندي إحساس بالامتنان للكون..هي آه أوقات قليلة بس بتيجي يعني، الحمد لله

الحمد لله :)