Tirv

Tirv
Tõrva
Lidnanznam;	Flag;
Valdkund	Estinma
Eläjiden lugu (2024)	2,631 ristitud
Pind	4,8 km²
Telefonkod	+372−76x-xxxx
Aigvö	tal'vel UTC+2,; kezal UTC+3

Tirv (est.: Tõrva «terv», saks.: Törwa) om Estinman lidn da volost' valdkundan suves. Mülüb Valgan makundha, sen kahtenz' surtte lidn koumespäi. Estinman koncertoiden üks' keskusišpäi, oleskeleb läz sadad koncertoid da mugoižid aigtegoid vodes.

Istorii

Žilo sai lidnan statusad vn 1926 2. päiväl heinkud. Vll 1950−1959 lidn oli Tirvan rajonan keskuseks. Nevondkundaližen aigan Tirv-il'mbaz oli olmas lidnanno.

Tirvan ižandusen päsarakod oma mecan ümbriradmine i turizm.

Geografijan andmused

Lidn sijadase makundan lodehes, kukhikahas tahondas, Ihne-jogen keskjoksmusen randoil (est.: Õhne jõgi 94 km pitte, lankteb Virtsjärvhe), 58 m ü.m.t. keskmäižel korktusel. Landšaft om formiruidud mecakahal sel'gal (Tirvan Kargkukkaz) jogen hural randal lidnan suves, Riisk-järvel (est.: Riiska järv) Valgan mantenno i Vanamiiz-järvel (Vanamõisa järv) lidnan pohjoižröunanno.

Matkad Latvijan röunhasai om seičemetoštkümne kilometrad suvipäivlaskmha orhal, Tallidnhasai om 173 km pohjoižhe-lodeheze orhal vai 208 km avtotedme. Matkad makundan Valg-keskushesai om kaks'kümne viž kilometrad suvhe orhal vai 28 km avtotedme. Toižed lähembaižed lidnad oma Abja-Paluoja päivlaskmha-lodeheze, Vil'jandi pohjoižhe, Otepä päivnouzmha.

Tobmuz

Kaik kaks' žilod i 37 küläd alištudas Tirvan volostin (est.: Tõrva vald) tobmudele vn 2017 redukun 24. päiväspäi. Volostin pind — 647 km².

Eläjad

Vn 2011 Estinman rahvahanlugemižen mödhe lidnan eläjiden lugu oli 2 729 ristitud, heiden kesken estilaižed otiba 98,8 %, toižed rahvahad i rahvahuden ozutandata — 1,2 %. Vn 2021 rahvahanlugemižen mödhe lidnan ristitišt oli 2 701 eläjad, heišpäi estilaižed 98,2 %.

Kaikiš suremb lidnan ristitišt oli 3 128 eläjad vl 1940 i 3 112 eläjad vl 2006. Kaik 6 129 ristitud elihe Tirvan volostiš vn 2019 augotišes.

Openduz

Lapsiden opendusen aluzkundad oma kaks' päivkodid, Tirvan gimnazii (521 openikad 2009/2010. openduzvodel), norišton keskuz i lapsiden kirjišt. Valdkundaližen büdžetan toižed aluzkundad oma kul'turkeskuz, tervhuden keskuz stacionaranke (20 sijad), rauhiden mehiden kodi, lidnan kirjišt.

Lähembaižed professionaližen opendusen aluzkundad ratas Valgas.