Kate Bush

Kate Bush

Persovntiäđuh
Šoddâm	syeinimáánu 30. peeivi 1958 (ahe 68)
Šoddâmsaje	Kent, Lontoo, Ovtâstum kunâgâskodde


Aalmugjeessânvuotâ	eŋlandlâš
Musikkár
Artistnommâ	Kate Bush
Lávlumkielah	eŋgâlâskielâ
Aktiivlâžžân	1978–
Genreh	taaiđâpop, progressiivlâš pop
Čuojânâsah	kuoskâttâsčuojânâsah, vivlu, kiitaar

Catherine "Kate" Bush (š. syeinimáánu 30. peeivi 1958, Kent, Lontoo, Ovtâstum kunâgâskodde) lii eŋlandlâš musikkár já lávloo. Bush kulostui ive 1978, ko suu single "Wuthering Heights" pajanij Britannia listo njunošân. Ton maŋa sun lii almostittâm oovce studioalbumid.

Eellim já karrieer

Nuorâvuotâ já karrieer algâ

Catherine Bush šoodâi Kentist Lontoo alda ive 1958. Sun juuđij katolilâš Joseph's Convent Grammar School já máttááttâlâi jo pärnin piano já viivlu čuojâttem. Nuorrân sun čäliškuođij meid jieijâs pittáid. Bush eeji ustev Ricky Hopper tuubdâi Pink Floyd kitarist David Gilmour já finnij suu kuldâliđ 15-ihásâš Bush demoid. Maŋeláá Bush finnij Gilmour vievâst sopâmuš EMI-skiärrufinnoduvâst. Uđđâivemáánust 1978 almostui suu vuosmuš single "Wuthering Heights", mii finnij inspiraatio Emily Bronte siämmáánommâsâš romanist sehe eromâšávt tast rahtum elleekooveest, mon Bush lâi uáinám. Single pajanij Britannia listo njunošân já ton maŋa almostum vuosmuš album The Kick Inside (1978) sajan kulmâ. "Wuthering Heights" lâi vuosmuš nissoon nuotâstem, sanniittem já oovdânpyehtim single, mii pajanij Britannia listo njunošân.

Bush nubbe album Lionheart (1978) pajanij sajan kuttâ Britanniast já ij finnim siämmáálágán mielâstumvuođâ ko vuosmuš album. Maŋeláá sun eeđâi, ete The Kick Inside mielâstumvuođáin jotelis ávhástâllâm tiet album rähtimproosees lâi liijkás hoppuu já huolâttem. Ive 1979 kiiđâ ääigi Bush algâttij turnee, moos kuulâi ennuv tanssâm, teatraallâšvuotâ sehe muálkkáás čuovviittâs. Bush lâi ohtâ vuosmuin, kiäh kevttii kaabelttes mikrofon lávdástem ääigi. Kaabelttes mikrofon vievâst Bush puovtij lihâstâllâđ rijjâ lyeve alne. Turnee feilij ruttâlávt já tot lâi Bushân nuuvt lussâd, ete tot paasij suu áinoo turneen 37 ihán.

1980- já 1990-lovoh

Ive 1980 almostuvvii Bush nubbe top 5 -single "Babooshka" já siämmáá ive listo njunošân pajanâm album Never for Ever. Album lâi vuosmuš mast Bush lâi fáárust pyevtitmist já maŋeláá sun pyevtittij puoh albumijdis jieš. Čuávuvâš album The Dreaming (1982) lii kenski Bush keččâlâddâmvuálásumoš album. Tast kiävttoo ennuv Fairlight CMI -syntetisaattor, mon Bush lâi uáinám tolebáá Stevie Wonder konsertist. Album pajanij Britannia listo sajan kulmâ.

Porgemáánust 1985 Bush almostitij suu čuávuváá single "Running Up That Hill", mast šoodâi suu nubben enâmustáá kávpálávt miänástum single. Ton maŋa almostum album Hounds of Love pajanij Britannia listo njunošân já vuossâmuu keerdi meid Ovtâstum staatâi liiston. Uđđâivemáánust 1987 almostui nurâldâh The Whole Story, mast lijjii fáárust uđđâ versio "Wuthering Heightsist" sehe aaibâs uđđâ single "Experiment IV".

Čuávuvâš studioalbum The Sensual World (1989) pajanij Britanniast sajan kyehti. Album finnij meid merhâšittee promootio Amerikist, kost sun finnij sopâmuš Columbia Recordsist. Čuávuvâš album The Red Shoes miänástui-uv viehâ pyereest Ovtâstum staatâin ko pajanij listo sajan 28. Britanniast pyeremus saje lâi The Sensual World naalijn nubbe.

Diskografia

Studioalbumeh

Nurâldâhalbumeh

1986 – The Whole Story
1990 – This Woman's Work 1978–1990

Keejâ meid

Listo Kate Bush pitáin

Fáádást eres soojijn

Wikimedia Commonsist láá koveh teikkâ eres tiätuvuárháh fáádást Kate Bush.

Käldeeh

č s m Kate Bush
Studioalbumeh	The Kick Inside (1978) • Lionheart (1978) • Never for Ever (1980) • The Dreaming (1982) • Hounds of Love (1985) • The Sensual World (1989) • The Red Shoes (1993) • Aerial (2005) • Director’s Cut (2011) • 50 Words for Snow (2011)
Livealbumeh	Live at Hammersmith Odeon (1994) • Before the Dawn (2016)
Nurâldâhalbumeh	The Single File (1984) • The Whole Story (1986) • This Woman’s Work (1990) • The Other Sides (2019)
EP:h	On Stage (1979) • Kate Bush (1983) • Aspects of the Sensual World (1990) • Eat the Music (1993)
Videoalmostitmeh	Live at Hammersmith Odeon (1981) • The Single File (1983) • The Hair of the Hound (1986) • The Whole Story (1987) • The Sensual World - The Videos (1990) • The Line, the Cross & the Curve (1993)