Kuwait Zoo

من عاداتنا و تقاليدنا انا و اختي انه نحط لنا في كل عطلة جدول رحلات لأماكن منوعة بالكويت ..

لكن هالصيف غير .. لا سوينا جدول ولا حطينا خطط .. خلينا يومياتنا – عشوائية – نوعا ما ..

بس الملل سيطر علينا شوي و قررنا نكسر روتينا برحلة الى حديقة الحيوان ..

خذينا رفيجاتنا و رحنا ..

ما اذكر متى اخر مرة رحت فيها الحديقة .. يمكن كان عمري 8 سنين اذا مو اصغر ..

فقلت اكييد عقب هالسنيين و هالغيبة الحديقة بتتغير و تتطور .. لكن الصدمة ان كل شي على حطت ايدنا!! ..

او يمكن تغير للأسوأ ..

فتعالو وياي اخذكم بجولة للحديقة ..

أولا المدخل ..

أدري يعطي انطباع ان الحديقة – متعوب عليها –

خلونا ندخل و نشوف ..

هذا النمر البلاستيكي كان في استقبالنا ..

اول مادخلنا ماعرفنا وين نروح في اي اتجاه .. فمشينا على الله لين وصلنا لمبنى الزواحف ..





زواحف بالكويت يعني اكيد راح يكونون حيايا و ضبان !..


هذا الضب و كانو حاطينله صحن سلطه .. ضب كويتي مدلع ..

و هذيله الفيران حاطينهم يوكلون فيهم الحيايا
حرااااااااااام



خلصنا من الزواحف و كملنا رحلة استكشافنا بالحديقة ..

بحيرة البجع .. قمة الرومانسية

و هذا مادري شنو بالضبط .. في شبه من الطاووس و في شبه من النعامة .. الظاهر فصيلة نادره!..

هالغزلان لحد يقرب صوبهم .. قمة الوحشية ..

ضاقت الاماكن بالحديقة و حطو الغزلان و الطواوويس بنفس القفص ..

عقبها يابو الزرافات و حطوهم مع الغزلان! .. شكلهم اجتماعيين و مايحبون الوحدة ..

فرس النهر مادري خرتيت البحر ..

و طبعا كويت زوو مشهورة بالشواذي .. أول مرة اشوف حديقة فيها شواذي هالكثر!..
هالقفص فيه 100 تعش شاذي مع بعض ..

مادري من وين متعلمين الطرارة .. كل واحد يمد ايده علشان نعطيه اكل ..

قفص الطيور .. يزاهم الله خير الأمانة العامة للأوقاف تصدقو فيه!!..

مقتطفات من الحديقة ..

الفيل تحفة .. شكلهم ماخذينه من سيرك .. كل ما احد قط عليه اكل يرفع نص جسمه على السور و ياخذ الاكل بخرطومه ..

الصراحة انا خفت ينحاش و يهجم علينا ..

ووخيتي وكلته بفك بو خواتم بس ما ياز له .. شم ريحته و قطه ..

والدبب صج دبب .. يموتون على البفك .. عطيناهم جيسين و ماكفاهم ..

يوم شافتنا هالشاذية بالقفص المجاور نوكل الدببه و مانوكلها تفلت علينا! -وانتو بكرامه-.. قلة ادب ..

اكثر شي يعور القلب بالحديقة ملك الغابة .. شكلة مومتسبح .. ضعيف .. هزيل .. يالله يتحرك .. و يتثاوب .. و شكلهم ما يمشطون شعره!! ..

و هذيلة حريمه .. يحليله متزوج ثنتين ..

و اخر شي خذينه جوله بالحديقة بالقطار بو ربع دينار و كانو حاطين اغاني مادري من وين يايبينها تعور الراس ..

و ختمنا طلعتنا ببرد مكينه من الروضه .. لذييييييييييييذ ..


ملاحظة: الي ناوي يروح حديقة الحيوان ياخذ معاه كمام لان الريحة مع الحر لا تطااااااااااق ..
شكر خاص لأم رفيجتي اللي انقذتنا و حطت لنا كمامات في جنطة بنتها ..

عندي كلام شكثر عن الحديقة .. ودي اتحلطم .. لكن اولا موضوعي انترس .. ثانيا لو بتكلم مافي احد بطور الحديقة و يرحم حال الحيوانات المساكين ..

خلوني ساكته احسن ..

بس تبون الصج .. على هالتحف الي شفناها .. استانسنا!