🔥 ข่าวด่วน: News Update - สรุปดราม่าล่าสุด

السبت، 9 يناير 2010

فخفخينا.....

قناة الحياة... برنامج معاد

واحد..الحقونا بيكسو بيوتنا وبيجرو ورانا الحقونا..ز

المزيع..يا استاز محمد انت قاعد فين يا جماعة حد يكلم الجزاير احنا مقتلناش مواطنين جزايريين هنا

اقلب....

قناة المحور...واحدة حلوة وشعرها اصفر (المزيعة).. يا جماعة الحالة دى حالة انسانية وياريت نتبرع لها باي مبلغ عشان يقدر يعيش لانة مش قادر يتعالج

اقلب

قناة دريم.... واحدغلبان...يا بية احنا كلنا هنا بقالنا 50 سنة عايشين وجايين يمشونا دلوقتي طب نروح فين احنا ملناش حتة تانية انا بناشد السيد....

اقلب ....

قناة روتانا سينما...محمد سعد(فيلم اللي بالي بالك)...ماهو يا اما توفرولهم الكولا يا توفرولهوم شندوشتات....

قناة ARTحكايات...تتر مسلسل بوابة الحلواني....وعشان كدة مصر ياولاد مصر ياولاد حلوة الحلوة اللي بنب بني مصر كان فالاصل...

قناة النيل مودرن سبورت...واحد ناقد...يا كابتن مدحت ميدو كان لازم يكون في المنتخب ميدو مسمع في افريقيا دة ايام مكان في انجلترا.....

اقلب...

قناة اليوم...مزيع اقرع(عمرو اديب)...والمشكلة طبعا هتعدي زي غيرها فلة شمعة منورة ولا كان حاجة حصلت وهنعد ناكل فشار قدام التليفزيون ومعاك سلاطاتك وبابا....

قناة مزيكا...مغني تافة(تامر)بيغني وفي بنات (تافهين)بيغمي عليهم والاستاز بيرقص علي اغنية هابطة

قناة الجزيرة...واحد خليجي ولا شامي,,,لا بد من فتح المعابر مصر تساهم مع اسرائيل في قتل الابرياء

القناة الخامسة....برنامج فاكر يا بحر....مزيعة شكلها وحش....بتسال واحد فمطعم ..اية سر تعلق الشعب السكندري بالفلافل او الطعمية؟!!!!!

قناة المصرية....محمد منير...قبل الطوفان مييجي ....فيلم حدوتة مصرية

وختاماا...قناة المجد للقران الكريم قران يتلي اناء الليل واطراف النهار...اية بالصوت الملائكي للشيخ عبد الباسط ﴿وسيعلم الذين ظلموا أيَّ منقَلَبٍ ينقلبون﴾

مش كل اللقطات دي حقيقية في منها من خيالي ولكنها عبارة عن افكار معينة فدماغي....

الجمعة، 11 ديسمبر 2009

النـاس نـامـت ..

منيـــــر ..

مـش هقـدر اتكلم عنـه , ولا هقـدر أوصـف أد أيــه هو انســان محتــرم ..

دايمـاً بحـس أن كـل المطـربين بيغنـوا لمجــرد الغنــا , اللى عــايز يبقــى مشهــور , اللى عــايز فلـوس , اللى بيهلّــس , اللى واللى واللى ...

هــو الوحيد اللى بيغنـى علشـان يوصّل فكـرة معيّـنه ..

ان كــان لكـل واحــد رســالة فى الحيــاة , أعتفــد فعـلاً أن منيــر أداهــا .. وبجــدارة

أحيــاناً , وبصــراحة مش أحيــاناً .. ده كتيــر جداً , بسـرح مع أغــانى منيــر وتفسيراتهـا , طعم البيـوت , ألف الشــوارع , بـرّة الشبــابيك , حواديت , ... ألخ

ومن أكتــر الأغـانى اللى بحبهــا " النــاس نــامـت " ..

الأغنيــة من كلمـات الشـاعر : إبراهيم رضوان , وألحــان : عبدالعظيم عويضه

تقــدر تسمـع الأغنيــة من هنـــا ..

ودى الأغنيــة زى ما العبد لله شايفهــــا ..

النــاس نامـت ألاك ..

النــاس نامـت ألاى ..

واقف ليه فى الشبــاك ؟ , بستنى اليوم الجاى

(بداية الموسيقى فى حد ذاتهـا فيها نوع من الخـوف , والتــرقب , جو عـام حزيــن , الوضع غير مريح ومش مظبــوط .. واحد بيسأل التانى : "الناس كلها نامت ألا أنتا , وأنـا .. واقف ليه فى الشباك ؟ بتبص على أيه بـره البـيت والنـاس نايمــة ؟" التـانى بيـرد عليـه : " بستنى اليــوم الجـاى " اليوم الحالى مش عاجبـه .. ومش راضى بيـه , ومستنى بكـرة أحســن )
خلاصـة الكوبليـه : اتنيـن مش عاجبهـم الحـال , وبيفكـروا فى التغييــر ..

يمكــن يسقينا الشـاى , يمكن يعطينــا الناى ..

أنا قد الهــوى وقدود , لو حتى الهـوى نســاى

( يمكــن يسقينا الشـاى : اللى مش لاقييــنه "كنـاية عن تدهـور حال البلد "
يمكن يعطينـا النـاى : يمكــن نقدر نقـول ونتكلم بـحـرية
أنا قد الهــوى وقدود , لو حتى الهـوى نســاى : أنـا مستعد أضحـى بأى حاجـة فى سبيل الحريـة دى , لو حتى كـانت صعبـة وبعيدة )

واقف بتغنى لمين ؟ لحبيبتى وللأطفــال ..

طب بص ورا الفتاريـن , شايف مهرة وخيال

( هتعمـل كل ده لميــن ؟؟ .. للنـاس اللى بحبهـم والجيـل اللى جاى
طب بـص كده شـوف أنـت عـايز توصـل لأيــه ؟ مش بالسهــولة دى , اللى خـاربينهـا متمكـنين منهــا , دول فـرسة والخيـال بتاعهـا !! )

البيت بيضيق ويضيق , لكن أنـا قلبى براح ..

باصص على مين يا صديق ؟ على طفل معاه مفتـاح

( الحــال من اســوأ لاسـوأ , لكـن بردو مفقدتش الأمـل ..
أملك فى ميــن.. مين اللى أنت شايفـه ممكن يعمل حـاجة ؟ الأمـل فى الجيـل اللى جـاى "وده واضح فى جملة : على طفل معـاه مفتـاح" )

هل كنـت فى يوم غدار ؟ أنـا نهـر النيل لو فـاض ..

طب فين زرع الأشعـار ؟ أنـا زارعـه أحـواض أحـواض

( "تهــديد" .. هل كنــت -أنـت- فى يوم غـدار ؟ .. أحنــا مش هنسكــت
أنــا نهـر النيـل لو فـاض : فى حـالة الغضـب "أحساس بالثـورة" طب فين زرع الأشعـار : فـاكرنى هسكـت ؟ , فاكرنى مش هتكلم ؟
أنــا زارعـه أحواض أحواض : كشـاعر , فهـوا ده سلاحــة , وفى سبيل الحـرية مش هيسكـت وهيتكلم ويقــول )

الأربعاء، 2 ديسمبر 2009

الراقــدون تحـت الغبـاوة ..

لعبنــا فى الســودان , واتغلبنــا فى الســودان , واتضربنــا فى الســودان .. ماشى , قـدّر الله ومـا شاء فعـل

وكل واحد أخد موقف , واللى مخدش أهو كتم فى نفسـه وسكـت (يعنى هيـا جت على دى ؟)

لكـن عمـوما , لا يفـاجئنى الكثيـر من الأحـداث التـى تحـدث على أرض هـذا الوطـن الأغـرّ..

طيب ده حتى المـاتش ده , بالسينـاريو ده جه فى الوقــت المظبوط ..عادة ياخويـا , ربنـا ما يقطعلنــا عــادة !!

أصــل ده عقبــال أملتك موسم الفـوقـااااااااان

ماهو لمـا التلميذ الخـايب يبقى قاعد نايم فى الفصل , بيـاخد المدرس غالبا على عـاتقه مهمـة افـاقة الصغيـر عن طريق قفـا من النـوع المستكـوفى ..

واحنــا قفــانا يـاما ورم ..

أيشى عبارات ,

وأيشى قطـارات ,

وأيشى صفر مونديـال , .. ألخ ألخ

وخد على قفـاك حتى طلـوع الشمـس !

"والله أحيـانا كتيـرة بتصعب عليا الحكومـة دى ! .. كل ما ييجـوا يقنعـونا شويـة أن البلـد فى تغيـر للأحسن , ينزل القفـا بلا هوادة D:"

وعمـلا بحكمـة صديقـى البـُرم : " متحكـيش فى المحكى " , خَلُصـت الى نظـرية " الفـوقـة" كتبريـر يرضى ذمتـى فى كل هذه الأحداث !

لكـن الذى لم أستطع تخطيـه , وعجـزت عن استيعـابه قريحتى المسكينـة .. هو سؤال واحــد :

لمـاذا احتفينــا بعلاء مبــارك ؟؟؟

هل عمـلا بمبدأ : " خللى الواد يلعب , ماخـوه يامـا لعب " ؟

ولا أحنــا جمـاعة من السذّج يعنـى ولا أيــه ؟؟

عمــل أيه عـلاء مبـارك عشـان ده كله ؟

وقبل أن تتســائل ما هذا الــ(ده كله) , أجيبـك ببعض المـانشيتات التى ملأت الصحف والمنتديات بعد مكـالمته الأسطورية لخـالد الغندور , والبيت بيتك :

"ارتفعت شعبية علاء مبارك، النجل الأكبر للرئيس المصري حسني مبارك، في الشارع المصري على خلفية التصريحات التي أدلى بها .."

"وأضاف بعض "المعجبين" تعليقات تصف علاء الذي تحمّل الكثير من الجزائريين خلال المباراة بـ"الوطني المغوار"، بل ذهب بعضهم لترشيحه لخلافة والده .."

" وامتلأت عدة منتديات على الانترنت ومجموعات على "فيس بوك" كانت سابقا تعارض التوريث، بدعوات تطالبه بخلافة والده .. "

" صحيفـة لوس انجلوس تـايمز : مبـاراة فى كرة القدم جعلـت الابن الأكبـر لمبـارك بطـلا .. "

"ودعا أكثر من تعليق علاء مبارك للترشح لانتخابات رئاسة الجمهورية منهم القارئ محمود عثمان الذى قال: «أنا عمرى ٤٢ سنة ومعنديش بطاقة انتخابية، لكن لو إنت هترشح نفسك فى الانتخابات الرئاسية بالشهامة والجدعنة دى، يبقى أنا من بكرة هطلّع بطاقة انتخابية وأنتخبك»"

.. ألخ ألخ ألخ

طبعـا الموضوع لا يحتـاج لتـأكيـد , لأنه كله كــان " على عينك يا تـاجر" , لكـن بردو نحط لينكيـن كده لزوم الشفافيــة :)

http://www.alarabiya.net/articles/2009/11/21/91986.html

http://www.elbashayeronline.com/news-72596.html

.. ودعنـى أزيد لك الطيــن بلة , عندمـا أقول لك أن اليوم التـالى " أو اللى بعده تقريبـا " للمكـالمـة الخـالدة , كانت الصفحـة الأخيـرة فى " المصـرى اليوم " يحتلهـا أعـلان ضخـم يثنـى علـى السيـد علاء على مـا قـام به من الدفـاع عن كـرامة الوطن المهـدرة !

طبعـا فكـرة هذا الأعـلان قديمـة و"مهـروشـة" من زمــان , رجـل أعمـال من الـوزن الثقيـل يغمـز للسيد عـلاء على طـريقة "محمـد سعـد " فى فيلــم " عـوكل " : أحنــا عـايزين ننــول الرضــا !!

قال أيه علاء مبارك ؟

بنشكر المنتخـب , عملـوا اللى عليهـم ..

جماهيـر الجزائر اللى حضـروا كانوا جمـاعة من المرتزقـة ..

مرضينـاش أنا وجمـال نروّح ونسيب المنتخب لوحـده ..

الجـزائر مغـلولين مننـا من زمـان , ولازم نبطل نطبطب ونحسس ..

شـوبير برده خد على دماغة شوية فى نص الكلام

وليسمح لـى أحمد مكـى باستعـارة العبـارة الشهيـرة فى فيلمـه الأخيــر ..

!!..So What

هـــا .. وبعديــن ؟؟ قـول ياسيدى واطــربنى .. بقــى هما الكلمتيــن دول اللى خلّـو النــاس تعمله بطــل ؟؟

يا عـالم , ياهــوه .. عـايزيـنه يبقى الريّس بالكلمتيـن دول ؟؟ .. الصـلاة ع النبى على ده شعــب !

وهـل بعـدمـا كـانت الانتخـابات الـرئاسيـة السابقـة تحـت شعـار " أحنــا عــايزين المعـلم .. مش اللى لسـه بيتعلـم " , سيكتمــل المسلسـل الهـزلى السخيـف بشعــار قــادم " ابـن الـوز عـوّام " ؟

ورغـم أن بعض الخبثـاء أشـاروا الى أن " الجـون المـرّادى جـاى من بره حدود الملاعـب " .. لكــنى شايف ان المـرّادى لا لـوم على أى جهـة رسمية أو حكوميـة أو سيـاسيـة ..

ولا حتـى على السيـد علاء نفسـه ..

ماله علاء مبـارك ؟؟ أنا لا ألوم عليـه قيد أنمـلة .. الراجل طلع فى برنامج قال كلمتين حلوين وزى الفــل .. لوز اللوز

لكـن اسمحلى : لو بالكلام .. ننســى الالام , ده مكنش قال ولا عــاشق اه !!

طـب مانـا بعد المـاتش قلت كلمتيـن أجدع من دول .. محدش رشحنـى ليه رئيس جمهـورية ؟ D:

المـرّادى الشعـب هـو اللى بيثبت غبـائه , وجهله , وانسيـاقه العـاطفى اللى - ان شاء الله - هيـودينا كلنـا فى ستين داهيـة فى يوم م الأيــام

فى النهــاية , يحضـرنى كـوبليه من أغنيـة (سـاح يا بداح) لمحمـد منيـر , الكوبليــه بيقــول : "طول العمر العسكر عسكر .. بس النـاس , النـاس كـانت نـاس "

اه والله يا منيــر , كــانت نــاس !

علمتنـى , وعلّمـت عليّـا ..

مش دايمـا عشـان تتعلم الصح لازم تروح مدرسـة ..

ولا حتى تروح الجــامع أو الكنيسـة ..

ممكـن تتعلم حـاجة صـح من نــاس ممتوقعهمـش خالص , أو تكـون فاكـرهم ميملكـوش حاجة صح أصلا عشـان يعلموهـالك ..

فى ليلة من ذات ليـالى الشتـا , من حـوالى سنتيـن تقريبــا , قـررت أنا واتنيـن صحـابى نـروح " حفلـة " ..

مش بتـاعة مطـرب ولا حاجـة لا سمح الله :) , دى حفلـة من اللى بتبقى بالـ( D J ) وشبـاب وبنــات ورقـص وهيبــرة , وارقـص يا محمد يابو سويلم !! , الجـو بيـرة وخمـرة منتشـرة , دخـان فى كل حتة.. البنـات معظمهـا لابسـه مالا يحمـد عقبـاه ..

قضينـا الليـل فى محاولات "تظبيط" بعض المتمايلات , بعضها بائت بالفشل .. والبعض كتب له النجـاح , ياللا ماعلينـا

قرب النهـاية كده وبعد الفـرهدة والمـرواح والمجـىّ , قلنـا نقعد على طرابيزتنا (هى بالتـاء ولا بالطـاء ؟) ونحتسـى الـ(سوفت درينك)

قاعدين عادى جدا فى أمـان الله , فاذا بـ(مزّة) عيـار 24 تصهلل وتتمـايل مع صديقاتها من السكـر والدرمغـة , والذى جعلها - بطبيعة الحال - لا تعرف أنهـا جائت حتى الحـافة الفـاضية فى طرابيزتنا ليظهــر مع عدم اتـزانهـا هذا الـ (G-STRING) من تحـت البنطلـون .. !

ولمــن لا يعـرف الـ(G-STRING ) , فهـو - أعـزكم الله - عبـارة عن خيط " أى والله خيط " يستعـاض بـه عن الـ " under wear" الحــريمى ( نفسى أعــرف ليــه ؟) ..

المهــم .. وتحت تأثير الصدمـة , انجعص كل منـا فى مكـانه , تاركـا ما تبقـى من (سوفتـه) فى الكـأس بلا اهتمـام .. متأمليـن فى هـذه الصدفة السعيدة التى جـائت بالمـزّة السكيـرة حتى عندنـا لنـرى ونتفـرج , ويمكـن " نظبط الاداء"

لكـن لحظـة التأمل لم تدم كثيـرا على الصيـّع الـثلاثـة حينمـا لمحتهم المـوزة واقعين تحت تأثير الـ(G-STRING ) العزيـز ..

تقوم تعمـل أيه بنت السكــرانة ؟

أخدت كاس صديقى الأول , وصبته فى كاسى , وأخدت كاس صديقى الثانى , وصبته فى كاسى ..

وراحت رافعة الكاس كله علـى بــوء واحـد , ثم هبدت الكاس على الترابيزة على طريقـة سكّيـرى الأفلام العربـى , ثم اتبعت ذلك بجملة لن أنسـاها ما حييت : " مع أنـى مش متعــودة اخد حـاجة مش بتاعتـى ! " , ثم ذهبت فى حـال سبيلهـا بعدمـا تركتنـى غـارقـا فى الجمـلة التى قالتهـا هـذه المسطــولة ..

وحتـى لحظـة كتــابة هذه السطـور , نفســى أعــرف ..

يا تــرى كـان قصدهــا أيـه ؟

الاثنين، 30 نوفمبر 2009

مخيـّـر أم مصيـّـر .. ؟

بهــدوء خــالص أهــو , ومن غيــر ماخـدك فى تفاصيـل وبتــاع ..

تيجــى نحكمهـــا بالعقــل ..؟

الأنسـان مخيـّـر أم مصيـّـر .. ؟

الموضـوع ده سمعـت فيه كلام كتيــر جـدا , لـكن أنـا ليّـا وجهـة نظـر بسيطـة فيه

ركـز معـايا سوانى ..

لو بتعمـل تجربـة فى المعمـل , التجربـة دى بتـطـلّـعلك نتـايج معينــة ..عمرك ماهتلاقى نتايج التجـربة هى نفـس نتـايج القـانون اللى على الورق ..

ليــه ؟؟

لأن القانـون اللى على الورق ده لم يشمـل كل العـوامل و المتغيـرات (variables) اللى ممكـن تحصـل

وعلـى فكـرة , مش ممكن أبدا أنك تحصـر كل المتغيـرات اللى بتأُثر على حـاجة معينـة ( الجمـاعة بتوع الكليـات العلمـى أكيد فاهميـن الحتة دى )

بـردو ليــه ؟؟

عشـان تفهم ليـه ؟ .. اقـرا كده الجـزأ ده من مقـالة اسمهـا (فـراشة فى طوكيو تحدث أعصـارا فى نيويورك ) :

" لـنتصور طاولة بلياردو تحتوي على عدد من الكرات, ولنفترض إلغاء أثر الاحتكاك في عملية الاصطدام بين الكرات في حالة ضربها بالمضرب, وبإلغاء الاحتكاك فإن عمليات الاصطدام الناشئة عن ضربة واحدة سوف تستمر إلى ما لا نهاية ولنتصور الآن أننا نريد أن نتنبأ بموقع إحدى الكرات بعد حدوث عدد من الاصطدامات بينها وبين الكرات الأخرى, ولكي نقوم بهذا العمل فإننا نتسلح بقوانين الحركة المعروفة ونقيس زوايا الارتطام والارتداد والسرعات التي تتحرك بها الكرات داخل الطاولة, ولكننا إذ نفعل ذلك سوف نهمل قطعا الكثير من المؤثرات على حركة الكرات داخل الطاولة مما نعد أن إهماله لن يؤثر على حساباتنا لمسار الكرة المراد دراسته, ولكي يتضح أثر إهمال هذه العوامل بشكل فاضح, لنفترض أننا أهملنا قوى الجذب بين كرتنا المذكورة وبين إلكترون يقع في أقصى مجرة «درب التبانة» التي نسكنها!!

بحساب قوى الجذب بين هذين الجسمين يتبين لنا أن الإلكترون سوف يحدث انحرافا في مسار الكرة مقداره 1×10-99 درجة, أي فاصلة وأمامها الرقم واحد يسبقه تسعة وتسعون صفرًا من الدرجة, لو كانت هذه الكرة تسير في خط مستقيم فإن انحرافا بهذه الضآلة الشديدة لن يؤثر على تنبؤنا بمسارها. فلو سارت الكرة في خط مستقيم مسافة قدرها قطر الكون المعروف فلن يؤثر إهمال الإلكترون على تنبؤنا بمكان وصولها إلا بمسافة تقل كثيـرًا جدا عن قطر ذرة الهيدروجين! لكن الأمر يختلف كثيرا داخل طاولة البلياردو! والسبب في ذلك هو اللاخطية (Non-Linearity) التي تحكم الحركة والاصطدام داخل الطاولة والناشئة عن الانحناء في أسطح كرات البلياردو, الأمر الذي يختلف عن مجرد انطلاق الكرة في خط مستقيم من مكان إلى آخر. إن كل اصطدام يقع بين الكرة المرصودة وإحدى الكرات الأخرى على الطاولة سوف يضاعف من الخطأ الناشئ عن إهمال الإلكترون في حساباتنا بما يقارب العشر مرات. وهذا يعني أنه بعد مائة اصطدام سوف يصبح الخطأ في حساباتنا لمسار الكرة بمقدار درجة واحدة! وبعد الصدام التالي سيصبح 10 درجات والذي يليه سيحدث خطأ مقداره مائة درجة ثم ألفا, وهكذا! أي أننا سوف نفقد الأمل تماما في متابعة مسار الكرة بعد الاصطدام رقم 102 وذلك فقط بسبب إهمالنا لإلكترون في أقصى المجرة!! ولا شك إذا أننا لن نستطيع أن نتابع مسار الكرة إلى ما بعد ثلاث أو أربع اصطدامات بسبب العوامل الكثيرة المعقدة والتي تؤثر في هذا النظام المحدود. هذا فيما يخص التنبؤ بمسار كرة في طاولة بلياردو.. وبقي أن نقول: أن ما يدور في الكون أعقد «قليلاً» مما يدور على طاولة البلياردو! "

يـااااااااااااااااااااه .. شفــت بقى العوامل والمتغيــرات كتيــرة أزاى ؟؟

عشــان كده أنت - يا ولداه - مش هتطلّـع قــانـون يديك نفـس النتـايج بتـاعة التجربـة العمليـة بنسبــة 100 %

مستحيــــل !!

طيب يحصـل أيه لو قـدرت تحصــر كل المتغيـرات دى وتحطهــا فى اعتبــارك ؟ , ساعتهـا القـوانين بتـاعتك (الجديدة) هتديـك نفس النتـايج بتـاعة التجربـة العمليـة بدقـة 100%

يعنــى أيــه ؟ , يعنى قبل ما تعمــل التجـربة هتكــون عــارف نتـايجهــا بالظبط

يعنـى أيـه ؟ , يعنـى ببسـاطة تقدر تتنـبـأ بالمستقبــل !

عـارف مين هـوا الوحيد اللى عنـده كل العـوامل والمتغيـرات اللى بتـأثر فى الكـون كله ( ومنهم النفـس البشـريـة ) ؟

الله سبحــانه وتعـالى

الفـرنجـة ولاد الفـرنجة بيطلقـوا لفظ "The Creator" بمعنـى "الخـالق" أو "الصـانع" , اللفظ ده بالذات بيوضح المقصــود .. الصانع دايمـا بيكون هو أعلم واحد بالشئ اللى صنعــه , وعـارف كل كبيـرة وصغيـرة عنه

م الاخـر , أنـت مخيـّـر .. اعمل اللى أنـا عـاوزه , ربنـا - سبحانه وتعالى - عـارف أنت هتعمـل أيه قبل حتى ماتعملـه , لأنك ببســاطة تجـربة معلومـة العـوامل والمتغيّـرات

بس كــده ..

البدايــة ..

بسم الله الرحمـن الرحيــم ..

دى أول تدوينـة ليّـا فى حيـاتى ..

أحسـاس غريب وأنت بتكتـب البـداية " أو المفـروض أنك تستغـربـه "

هل المفـروض أنـى أقف كتيـر وأنـا بكتب البدايـة ؟.. معتقدش

هنـا هتكلم - ان شـاء الله - عن أى حـاجة تيجـى فى دمـاغى .. بـــ"مزاجـى" , ولــ"مـزاجـى"

يا مسهــل ..

أحـــدهم