Lex Uiting

Dit artikel is gesjreve (of begós) in 't Venloos. Laes hie wie v'r mit de versjillende saorte Limburgs ómgaon.

Lex Uiting (Blierik, 24 augustus 1986) is 'ne Nederlands-Limburgse zenger en presentator. Landelik is hae veural van zien presentatiewerk veur de tv bekind, maar in Limburg haet hae mier bekindheid as zenger in 't Venloos plat.

Laeve

Uiting begós in 2002 in zienen band Zoemaar. Daonaeve speulde hae vanaaf 2005 ouk de trombone in Laef. Veurasnog hadde hae en zien muziekvrinde dao veural in de stad succes mei, maar in 2011 kóste ze in Venlo waal 't Zomerparkfeest äöpene. In 2012 stopde Zoemaar daomei.

Óndertösse waas Uiting in 2005 journalis beej BNN gewaore, op de radio. Hae werkde iers veur BNN United op Radio 1 en daonao veur achterein Wout! en de Coen en Sander Show op 3FM. In 2007 ging hae nao de VARA, wao hae zoeëwaal op de radio as op de tv kwaam. Hae waas ónder mier te zeen in De wereld draait door en De beste singer-songwriter van Nederland. Sinds 2009 presenteert hae Kinderen voor Kinderen. Op de radio waas 't tösse 2012 en 2016 te hure in de mörgeshow van Giel Beelen.

Nederland boete Limburg lierde Uiting es dialekzenger kinne in 2014. Hae schreef toen 't leedje "Vanaaf vandaag", veur de broelof van zienen broor. 't Woort opgepik door ónder mier Giel Beelen, 100%NL en QMusic. Dit woort 'ne groeëten hit. In 2017, 't jaor det hae in Venlo woort oetgerope tot Prins Lex I, brach hae "Nao 't zuuje" oet. Dit leedje haet zie prinseschap as thema en deende ouk es titelsong veur de documentaire die dao in 2018 euver oetkwaam. "Nao 't zuuje" veurde verschillende kiere de Limbo Top 100 aan.

In 2019 ging Uiting beej RTL Boulevard aan 't werk en vanaaf 2020 ouk es presentator. Bekind woorte interviews mit 'ne wegloupenden Thierry Baudet en 'n confrontatie mit Johan Derksen. In 2021 maakde hae, weer veur de NPO, De tumor tapes, euver de kaanker dae zien vrindin Susan Oostdam in häöre boek had.

Óndanks zien groeët aantal muziekaal activiteite brach hae pas in 2023 e debuutalbum oet. Heejop steit ouk 't "Leste leedje", e duèt mit Chantal Janzen.

Op 25 jannewari 2026 goof Uiting, same mit Frans Pollux en 't Metropole Orkest, e concert in de Ziggo Dome in Amsterdam. Dit waas 't groeëtste Limburgstalig concert oeëts boete Limburg gehalde.

Externe links

Persuuenlike website
Profiel op Streektaalzang.nl