Advertencia: A Wikipedia non dá consellos médicos. Se cre que pode requirir tratamento, por favor, consúltello ao médico.
A saúde mental é un estado de benestar psicolóxico e social relacionado co equilibrio entre unha persoa e o seu contorno sociocultural, o que favorece a súa participación laboral, intelectual e nas relacións sociais para alcanzar unha boa calidade de vida.
O termo «saúde mental» emprégase por analoxía co de «saúde física», pois abrangue dimensións máis complexas ca o funcionamento exclusivamente orgánico do individuo. Ambas forman parte da saúde xeral. O concepto inclúe o benestar subxectivo, a autonomía e o potencial emocional, entre outros.
As precisións da Organización Mundial da Saúde establecen que a saúde mental non é só a ausencia de trastornos mentais. Defínese como un estado de benestar no que as persoas poden desenvolver as súas capacidades, afrontar as tensións habituais da vida, aprender, traballar adecuadamente e contribuír á súa comunidade.[1]
Un punto no que coinciden diferentes especialistas é que a saúde mental e os trastornos mentais non son conceptos necesariamente opostos. É dicir, a ausencia dun trastorno ou desorde mentaldiagnosticado non indica necesariamente que se teña unha boa saúde mental e, á inversa, padecer un determinado trastorno mental non constitúe un impedimento absoluto para gozar dun benestar mental razoabelmente bo.[1]
A observación do comportamento dunha persoa na súa vida diaria pode achegar información sobre o estado da súa saúde mental en aspectos como a xestión dos seus temores e o uso das súas capacidades, as súas competencias e responsabilidades, a maneira de afrontar as súas tensións e atender as súas necesidades, as súas relacións interpersoais e a maneira en que leva unha vida independente. Ademais, o comportamento ante situacións difíciles e a maneira de afrontar experiencias traumáticas poden proporcionar información adicional. Con todo, a valoración da saúde mental require considerar tamén os pensamentos, os sentimentos e o contexto persoal e social.[4]
