Artemis II

Artemis II
	Portread swyddogol criw Artemis II, o'r chwith, gyda'r cloc: Koch, Glover, Hansen and Wiseman
Enwau	Artemis 2 ; Exploration Mission-2 (EM-2) ;
Math o daith	Hedfan o amgylch y lleuad efo criw ynddo
Corff neu gwmni rheoli	NASA
Hyd y daith	9 diwrnod, 1 awr, 32 munud a 15 eiliad
Pellter a deithiwyd	694,481 milltir (1,117,659 km)
Manylion y cerbyd
Cerbyd gofod	CM-003 Integrity
Alldaith
Cychwynwyd	1 Ebrill 2026
Gofodwyr
Nifer y gofodwyr	4
Aelodau	Reid Wiseman ; Victor Glover ; Christina Koch ; Jeremy Hansen ;
Cychwyn y daith
Dyddiad lansio	22:35:12 UTC 1 Ebrill 2026
Roced	Space Launch System Block 1
Safle lansio	Canolfan Ofod Kennedy
Diwedd y daith
Adenillwyd gan	Llynges yr Unol Daleithiau
Dyddiad glanio	10 Ebrill 2026, 22:35:12 y.h. UTC
Man lle glaniodd	Y Cefnfor Tawel
	Rhaglen Artemis
← Artemis 1	Artemis III →

Taith i'r Lleuad oedd Artemis II (1-10 Ebrill 2026), wnaeth hedfan o amgylch y Lleuad. Mae'n rhan o raglen Artemis, sydd yn bwriadu creu lle parhaol i fyw a gweithio ar y lleuad.^[1]^[2] Lansiodd y roced yn llwyddiannus o Cape Canaveral yn Florida am 22:35:12 UTC (6:35:12 yh EDT, amser lleol) ar 1 Ebrill 2026. Dyma oedd y tro cyntaf i griw teithio yn llong ofod Orion, a gafodd ei henwi'n Integrity gan y criw.^[3] Dyma oedd y tro cyntaf i long ofod a chriw ynddi fynd i'r Lleuad ers Apollo 17 yn 1972.^[4]^[5]

Victor Glover oedd y person croenliw cyntaf, a Christina Koch oedd y fenyw gyntaf, a Jeremy Hansen oedd y person anamericanaidd cyntaf erioed i hedfan yn bellach nag orbit isel y Ddaear.^[6] Mae'r daith hefyd wedi mynd â phobl yn bellach i'r gofod nag erioed o'r blaen gan fynd mor bell â 252,757 o filltiroedd.^[7] Torrwyd record Apollo 13 o 1970 o 248,655 milltir.^[8]

Y daith

I baratoi ar gyfer y daith, cafodd dros 700,000 galwyn o danwydd ei lwytho i'r llong ofod, ac roedd y gofodwyr wedi cyrraedd y capsiwl nifer o oriau o flaen llaw.^[9] Lansiodd y roced a oedd yn 322 troedfedd o hyd am 22:35:12 UTC o Ganolfan Ofod Kennedy ar 1 Ebrill 2026. Roedd y capsiwl wedi cylchdroi'r Ddaear am tua 25 awr cyn anelu am y Lleuad.^[10]

Yr agosaf cyrhaeddodd y criw at wyneb y lleuad oedd 4,067 milltir. Collodd y criw gysylltiad gyda'r ddaear am 40 munud wrth basio'r lleuad rhwng 22:46 UTC a 23:24 UTC.^[11]

Ail-ymunodd Orion ag atmosffer y Ddaear tra'n symud ar gyflymder o 24,661 milltir yr awr (39,688 km/awr). Glaniodd y llong ofod yn y Cefnfor Tawel ger San Diego, lle roedd Llynges yr Unol Daleithiau yn cwrdd â nhw.

Y gofodwyr

Cyhoeddodd NASA enwau'r gofodwyr a fyddai'n hedfan llong ofod Orion ar 3 Ebrill 2023.^[12]

Y criw
Rôl	Gofodwr
Prif ofodwr	Reid Wiseman, NASA Ail daith ofod
Peilot	Victor Glover, NASA Ail daith ofod
Gofodwr arbenigol 1	Christina Koch, NASA Ail daith ofod
Gofodwr arbenigol 2	Jeremy Hansen, CSA Taith ofod gyntaf

Criw wrth-gefn
Rôl	Gofodwr
Gofodwr arbenigol	Andre Douglas, NASA
Gofodwr arbenigol	Jenni Gibbons, CSA

Cysylltiadau â Chymru

Defnyddiwyd technoleg cwmni laser 'Spectrum Technologies' o Ben-y-bont ar Ogwr ar gyfer y daith.^[13] Mae peiriannau'r cwmni yn defnyddio lasers i brintio rhifau a llythrennau ar wifrau, ac roedd rhai o'u gwifrau nhw yng nghapsiwl Orion.^[14]

Mae'r cwmni hefyd yn gweithio gyda SpaceX.

Ymgysylltu â'r cyhoedd

I gael mwy o sylw gan y cyhoedd, crëwyd gwefan gan NASA i alluogi i unrhywun gael cofrodd o docyn teithio digidol. Roedd enwau'r bobl a gafodd docyn hefyd wedi cael eu cofnodi ar gerdyn SD oedd wedi cael ei roi yng nghapsiwl Orion ar gyfer y lansiad.^[15]

Ar 4 Mawrth 2026, cyhoeddwyd bwydlen y gofodwyr ar gyfer y daith.